XOGAMOS AO FLOORBALL

  

O floorball ou unihoquei é un deporte de equipo, practicado en pista cuberta en todo o mundo. O obxectivo do xogo é meter unha pelota plástica na portería contraria usando un bastón lixeiro. Ambos os equipos teñen cinco xogadores e un porteiro na pista. As regras son bastante parecidas ás do hoquei sobre xeo, aínda que con algunhas diferenzas evidentes. É un xogo rápido, e é popular como un deporte competitivo así como para manter a forma física. Non existe ningunha clase de violencia neste deporte. 

O floorball ten as súas orixes en EEUU durante a segunda metade do século XX. Xurdiu como unha práctica derivada do hoquei xeo. Utilizábase nos colexios porque non era tan perigoso como o hoquei xeo ademais non facían falta patíns e pista de xeo. Rapidamente este deporte difundiuse por todo o país celebrándose en 1962 en Michigan o primeiro campionato de floorball. Difundiuse en Europa grazas a uns estudantes suecos, que o viron xogar en Holanda. A partir deste momento prodúcese o boom deste deporte sendo Francia o impulsor. En España introduciuse grazas aos colexios e institutos que incluíron este deporte na súa programación. Na actualidade pasou a chamarse Unihoquei. Pero tamén se lle chamou Plasticbandy, Softbandy, Floorbandy, Innebandy, Floorhokey, Unihoc. A nivel internacional, catro países dominaron este deporte desde a creación da IFF (Federación Internacional de Floorball) en 1986: República Checa, Suecia, Finlandia e Suíza. A competición internacional máis importante é o Campionato do Mundo, que se celebra cada dous anos: desde 1996 e nos anos pares en categoría masculina; e desde 1997 e nos anos impares en categoría feminina. Suecia proclamouse Campión do Mundo en categoría masculina na edición de 2006 celebrada en Suecia, mentres que Suíza fixo o propio en categoría feminina, no Campionato do Mundo que tivo lugar en Singapura en 2005. A popularidade do floorball vai crecendo en moitos outros países de Europa e outras partes do mundo. En 2006, a Federación Internacional de Floorball (IFF) contaba coas federacións e asociacións nacionais de 37 países.