BO VERÁN A TODOS/AS!

 

Finaliza un novo curso no que agardo que desfrutásedes das clases de educación física, e que no voso recordo, queden  os bos momentos que pasamos.

Moitas grazas a todos/as por visitar o blog.

Vémonos de novo o 11 de Setembro para seguir "desfrutando movéndonos".

Unha aperta moi grande e bo verán a todos/as.

DESPEDIDA DO ALUMNADO DE SEXTO DE EDUCACIÓN PRIMARIA

Un curso máis, e xa van catorce neste colexio, chegou o momento de despedirme do alumnado de sexto curso.

Foron nove cursos compartindo con vós moitos momentos,onde disfrutei moito aportando o meu graniño de area na vosa formación como alumnos/as, pero sobre todo, como persoas.

 

O meu principal obxectivo foi facer que disfrutárades da actividade física e o deporte, e que ao final desta etapa teñades uns valores que vos axuden a mellorar o día de mañá.

Espero que vos vaia todo moi ben nas vosas vidas, que saiades adiante e que aprendades a importancia que ten o esforzo para alcanzar os vosos soños. 

Moitas grazas por facerme partícipe das vosas vidas!

Unha aperta moi forte para todos/as!

Ata sempre!!!

LUCÍA E MANUEL CAMPIÓNS DO VIII TORNEO DE BÁDMINTON DA CRISTINA

 Lucía e Manuel proclamáronse campións das finais de quinto e sexto curso  de E. Primaria do VIII Torneo de Bádminton da Cristina , que se disputou durante os  meses de maio e xuño.

 Na final de quinto curso, Lucía  gañou por dous sets a cero a Adrián ( 21-14 e 21-13).

En sexto curso, Manuel logrou a victoria por dous sets a un ante  Rodrigo (21-11,16-21 e 21-12).

Ao final do partidos, os  finalistas recibiron sendos trofeos, e o  resto dos participantes de  cada curso, unha medalla de recordo.

Noraboa a tod@s!

ORIENTACIÓN NA ESCOLA

O alumnado de sexto curso de E.Primaria desenvolveu hoxe unha actividade de introdución á disciplina de orientación, realizando unha carreira de orientación no entorno do parque do Anllóns.

Con esta actividade lúdica de iniciación o que se pretende é facilitar a inmersión do alumnado nesta modalidade deportiva de maneira lúdica e cooperativa, buscando como obxectivos:

• Ofrecerlles  unha alternativa máis para o uso e gozo do seu tempo libre.
• Desenvolver diferentes aprendizaxes que poidan extrapolarse posteriormente para poder ser empregadas en diferentes situacións cotiás.
• Conciencialos da necesidade de coidar e manter os espazos naturais.
• Fomentar a colaboración entre eles/elas e a capacidade de traballo en grupo.
• Aprender a interpretar diferentes tipos de planos.

 

FINALISTAS DO VIII TORNEO DE BÁDMINTON DA CRISTINA 2023

 

Lucía,Adrián, Manuel e Rodrigo , clasificáronse para as  finais de 5º e 6º de E.Primaria do VIII Torneo de Bádminton da Cristina 2023.

Os resultados dos partidos de semifinais foron os seguintes:

• Irina & Adrián  : 19-21,14-21.
• Lucía & Abel: 14-21, 21-19, 21-17.
• Judith & Manuel: 16-21, 21-11,20-22.
• Uxía & Rodrigo: 21-19, 11-21,20-22.

O martes e xoves da  semana que vén terán lugar as dúas finais.

Moita sorte para todos/as!

COÑECE O MEU CLUB: ESCOLAS BALONMÁN XIRIA

 

Durante esta semana estiveron no noso centro dous adestradores das Escolas Balonmán Xiria,Jorge e Zarra,para facer unha presentación práctica e lúdica do seu deporte, explicar o funcionamento do club (localización, horarios de adestramento, competicións…)

Con este programa de Xogade ( Xogos deportivos en idade escolar) preténdese que os escolares do noso centro coñezan os recursos deportivos dispoñibles en Carballo. Ofrecéndolles así unha alternativa de ocupación para o seu tempo libre e fomentándose a práctica da actividade física entre a nosa poboación escolar. Con esta actividade desde o centro buscamos poñer en mans do noso alumnado a maior cantidade de recursos posibles, que lles axuden a conseguir uns hábitos cada vez máis activos e saudables, creando así un vínculo importante entre o centro e os clubs da nosa localidade.

Esta actividade terá continuidade o próximo martes.

XI CARREIRA POPULAR CONCELLO DE CARBALLO

O próximo domingo 4 de Xuño celebrase a XI CARREIRA POPULAR DE CARBALLO. Se estás interesado/a en participar, tes ata o mércores 31 de Maio para realizar a inscrición no seguinte enlace:

INSCRICIÓN