COÑECE O NOSO CLUB: BALONMÁN XIRIA.

Un curso máis,contamos durante esta semana no noso centro, coa presenza dos  adestradores das Escolas Balonmán Xiria que fixeron unha presentación práctica e lúdica do seu deporte a todo o alumnado de Educación Primaria, explicando o funcionamento do seu club.

O obxectivo desta iniciativa é que os escolares do noso centro coñezan os recursos deportivos dispoñibles en Carballo. Ofrecéndolles así unha alternativa de ocupación para o seu tempo libre e fomentándose a práctica da actividade física entre a nosa poboación escolar. Con esta actividade desde o centro buscamos poñer en mans do noso alumnado a maior cantidade de recursos posibles, que lles axuden a conseguir uns hábitos cada vez máis activos e saudables, creando así un vínculo importante entre o centro e os clubs da nosa localidade.

Moitas grazas a Sheila,Gabriel,Telmo e Álex  por adicarnos parte do seu tempo a ensinarnos o seu deporte.

BENVIDOS/AS AO CURSO 2026-2027

Plufi quere darvos a benvida ao novo curso escolar 2026-2027 en particular aos que chegades por primeira vez ao noso centro.

Espérovos o próximo mércores día 9, para desfrutar movéndonos.

Ata moi pronto!

BO VERÁN A TODOS/AS!

Finaliza un novo curso no que agardo que desfrutásedes das clases de educación física, e que no voso recordo, queden  os bos momentos que pasamos.

Moitas grazas a todos/as por visitar o blog, en especial, ao alumnado de 6º de Educación Primaria que remata a súa etapa no noso centro.

Vémonos de novo o 9 de setembro para seguir "desfrutando movéndonos".

Unha aperta moi grande e bo verán a todos/as.

PVAD.MATEO E XURXO CAMPIÓNS DO X TORNEO DE BÁDMINTON DA CRISTINA.

Mateo e Xurxo proclamáronse campións das finais de quinto e sexto curso  de E. Primaria do X Torneo de Bádminton da Cristina , que se celebrou nos recreos  deste último trimestre do curso.

Na final de quinto curso, Mateo  gañou por dous sets a cero a Adrián ( 21-13 e 21-19).

En sexto curso, Xurxo logrou a victoria por dous sets a un ante Manuel (21-14,18-21 e 21-17).

Ao final dos partidos, os  finalistas recibiron sendos trofeos, e o resto dos participantes de  cada curso unha medalla de recordo.

Noraboa a tod@s!

 

PVAD. A CRISTINA PARTICIPOU UN ANO MÁIS NO CAMPIONATO PROVINCIAL DE CROS ESCOLAR.

Fantástica mañá de deporte a  que pasaron  os dezasete alumnos/as que  representaron ao colexio no Campionato Provincial de campo a través escolar celebrado esta mañá en Porto do Son.

Os nosos atletas competiron con outros centros educativos de toda a provincia da Coruña e foron un exemplo de compañeirismo e deportividade, na que todos/as deron o mellor de si. 

Que orgullosos estamos de todos/as!

Quero darlle as grazas a todos os nenos/as que participaron esta tempada nas dúas Fases, polo seu esforzo e comportamento, e animarvos, a seguir esforzándovos para intentar mellorar cada día.

Agradecer tamén a Patricia e ás familias, a súa inestimable colaboración durante toda a mañá.

Moitas grazas!

PVAD.CAMPIONATO PROVINCIAL DE CAMPO A TRAVÉS ESCOLAR.

 

Dezasete alumnos/as  representarán ao noso centro no Campionato Provincial de campo a través escolar, que se celebrará este próximo venres, no circuito do Campamento Virxe de Loreto de Porto do Son.

Todos/as chegan moi ilusionados á proba, aínda que conscientes da dificultade que entraña, xa que, neste campionato, tomarán parte os mellores atletas da provincia que se clasificaron nas fases intercomarcais da Coruña, Ferrol, Santiago e Noia.

Moita sorte a todos/as!!!

PVAD.FINALISTAS DO X TORNEO DE BÁDMINTON DA CRISTINA.

Mateo, Adrián, Manuel e Xurxo , clasificáronse para as  finais de 5º e 6º de E. Primaria do X Torneo de Bádminton da Cristina 2026.

Os resultados dos partidos de semifinais foron os seguintes:

• Mateo & Gael  : 18-21,21-14,28-26.
• Adrián & Aroa: 21-6, 19-21, 21-19.
• Manuel & Lorenzo: 21-16, 21-19.
• Sofía & Xurxo: 20-22, 12-21.

O luns e o mércores da primeira semana de xuño  terán lugar as dúas finais.

Moita sorte para todos/as!

PVAD. SURF NA PRAIA 2026.

Onte comezaron na praia de Razo as actividades de surf na praia englobadas no proxecto "Aprende a través do Surfing, que se desenvolverán ao longo desta semana e da que vén. 

Hoxe tocoulle o turno ao alumnado de cuarto de E.Primaria que participou ao longo de toda a mañá nunha xornada de convivencia, onde os nenos/as tiveron a oportunidade de desfrutar do surf, coñecer a cultura oceánica  e experimentar todos os valores do surfing.

O alumnado de 1º de Educación Primaria rematará a semana que vén as actividades do proxecto levadas a cabo durante este curso.

PVAD. IX CARREIRA POLA LINGUA.

Para conmemorar o Día das Letras Galegas, hoxe celebramos na pista polideportiva do noso colexio, a "IX Carreira pola Lingua do Ceip.Plurilingüe A Cristina",na que participou todo o alumnado do centro, para reivindicar a defensa da nosa lingua e fomentar os hábitos saudables.

PVAD. X TORNEO DE BÁDMINTON DA CRISTINA.

Os alumnos/as de 5º e 6º de E.Primaria comezaron hoxe  o   X Torneo de Bádminton da Cristina. 

Ao longo das próximas semanas celebraranse todos os partidos durante os recreos.

Moita sorte a todos/as!

PVAD.APRENDE A TRAVÉS DO SURFING 2026

Un ano máis, o noso centro participa no proxecto"Aprende a través do Surfing".

Durante esta semana, Martín da escola de surf "Boaola", desenvolverá  unhas sesións de iniciación ao surfing aos alumnos/as de todos os cursos de Educación Primaria.

Estas sesións terán continuidade cunhas xornadas de convivencia no mes de maio na praia de Razo onde os nenos/as terán a oportunidade de desfrutar dun bautismo de surf, coñecer a cultura oceánica  e experimentar todos os valores do surfing.